CESTA DE ACTIVIDADES PARA O NADAL: Árbore de Nadal con masa de follado e crema de cacao

Agora que se vai achegando o Nadal, ¿que vos parece se facemos unha árbore de Nadal con crema de cacao? Si a resposta é si, continuade comigo e ide preparando o que precisaremos. 

Ingredientes: 

– 2 láminas de masa de follado rectangulares 

– Crema de cacao 

– 1 ovo batido 

– 2-3 culleradas de azucre para empoar 

– 1 cullerada de azucre moído para decorar 

– caramelos de chocolate de cores 

Elaboración: 

1.- Poñemos a quecer o forno a 180º. Forramos con papel de enfornar unha bandexa de forno e reservamos. 

2.- Estendemos unha lámina de masa de follado, untámola con crema de cacao e cubrímola ca outra lámina de masa de follado. 

3.- Cun coitelo ben afiado facemos a forma da árbore e cun cortapastas facemos estrelas na masa sobrante. Retiramos a masa sobrante (eu non tiro nada, estes anacos sobrantes tamén os enforno porque están igual de bos). Mollamos cun pouquiño de auga a copa da árbore na punta e colocamos unha das estrelas enriba. 

4.- Nos laterais da árbore, facemos cortes cun coitelo, sen chegar ao centro, formando tiras do mesmo ancho (9 tiras a cada lado). Teremos que deixar un tronco máis ancho na base e que se vaia estreitando ata chegar á copa. 

5.- Dobramos cada tira de masa facendo unha espiral. As tiras máis próximas a copa da árbore só as xiramos unha vez. Imos engadindo xiros a medida que as tiras sexan máis longas. 

6.- Colocamos sobre a bandexa de forno e ca axuda dun pincel de cociña damos pinceladas co ovo batido. Tamén llo faremos a todas as estrelas. 

7.- Empoaremos co azucre a árbore e as estrelas. 

8.- Enfornamos durante 15-20 minutos, a 180º ou ata que vexamos dourada a árbore e as estrelas. 

9.- Retiramos do forno e deixamos arrefriar. 

10.- Decoramos empoando co azucre moído e colocando caramelos de chocolate de cores (pegámolos cun pouco de crema de cacao) nos extremos das pólas e por onde vos vaia parecendo para decorar a nosa árbore. 

E xa teremos lista a nosa árbore de Nadal. Agardo que vos guste a receita e que vos animedes a facela. É doada de facer e non ten dificultade para facela cos peques da casa. 

Bo proveito!