CESTA DE ACTIVIDADES PARA O NADAL: Panettone en panificadora

INGREDIENTES

Para o fermento:

- 100 gramos de fariña de forza 

- 30 gramos de fermento fresco 

- 1 cullerada sopeira de azucre

- 70 gramos de auga morna

Para a masa: 

- 5 ovos batidos.

- 150 gramos de manteiga con sal cortada en taquiños.

- 170 gramos de azucre

- Reladura dun limón

- Reladura dunha laranxa

- Unha cullerada de esencia de vainilla

- Todo o fermento

- 600 gramos de fariña de forza

Para o recheo:

- 100 gramos de pasas

- 75 gramos de froita confeitada ou chocolate

E por último para antes de enfornar:

- Un trociño de manteiga sen sal para poñer encima

- Un ovo batido para pintar o panettone.

ELABORACIÓN

Primeiro faremos o fermento, poñendo nun cacharriño a auga morna e nela desfaremos o fermento, engadímoslle o resto dos ingredientes e remexemos cunha culler ata que quede a fariña ben disolta, deixamos repousar nun sitio afastado de correntes de aire ata que acada o dobre de tamaño. 

Agora toca facer a masa: na cubeta da panificadora poremos todos os ingredientes na orde que están escritos ó principio da receita e programamos 3 veces o programa de amasado que dura 15 min. Deste xeito amasará un total de 45 min ata que a masa quede brillante, lisa e elástica como se aprecia na foto 

Toca deixar que levede ata que medre e dobre o seu tamaño. Eu acostumo a deixala levedar na mesma cubeta da panificadora colocándolle papel de enfornar por riba para que a masa non se pegue á tapa xa que medra moito. 

Cando a masa teña dobrado o seu tamaño, volcarémola sobre unha superficie enfariñada e estirarémola como se amosa na foto 

Unha vez que estea estirada engadirémoslle as froitas ou chocolate 

e enrolarémolo como amosamos na seguinte foto

Xuntaremos así os bordes 

Agora toca colocalo no molde que o vamos enfornar ca xunta dos bordes cara abaixo. O ideal é enfornalo nun molde propio para panettone. Eu acostumo a enfornalo nunha cazola fonda apta para forno. Teremos que deixalo levedar de novo ata que volva dobrar o seu tamaño. 

Podemos pintalo con ovo batido, colocamos un anaco de manteiga enriba do corte e meterémolo a enfornar co forno prequentado a 170 grados durante 40 min na reixa na posición máis baixa. Se se ve que medra moito aos 10 min de estar no forno é recomendable poñerlle por encima un anaco de papel aluminio para que non se torre. Cando estea cocido sacarémolo e deixarémolo arrefriar enriba dunha reixiña. 

O proceso é longo pero asegúrovos que o resultado é estupendo!!!. Aquí vos queda a mostra do de chocolate.