CESTA DE ACTIVIDADES PARA O NADAL: Folerpas de neve
Que vos parece facer unhas folerpas de neve para decorar as fiestras? Agora que se achega o Nadal, propoñémosvos facer unha manualidade sinxela e divertida, apta para tódalas idades.
Antes de nada, asegurádevos de que tedes o material preciso:
· Filtros de café
· Contagotas ou difusor
· Alcol (96º)
· Rotuladores escolares
· Tesoiras
· Cinta adhesiva ou blu tac
Comezaremos por facer un círculo o máis grande que poidamos dentro do filtro do café e o recortámolo. Podemos debuxalo coa axuda dun compás ou ben con algo que teña a forma desexada. De cada filtro sacaremos 2 círculos para facer 2 folerpas.
De seguido, debuxaremos con rotuladores escolares no círculo branco. Non é importante o deseño, xa que o seguinte paso será desfacelo. Para iso, espallaremos con axuda do goteiro algunhas pingas de alcol. Presta atención, porque é moi curioso como pouquiño a pouco a tinta se move e vai coloreando todo o filtro. Tamén podes ver como o fixemos nós no seguinte vídeo:
Debemos deixar secar ben o noso círculo. Para iso, abondará con que o deixes nun sitio quente e pouco húmido durante unha hora, ou dun día para outro en calquera lugar da casa. Podes aproveitar para facer outros deseños mentres!
Para rematar a folerpa, dobramos á metade, outra vez á metade e despois en 3 partes, como vemos nas imaxes:
Unha vez teñamos a forma dun cucurucho, deberemos recortar o deseño do noso copo de neve. É moi importante que non recortes ata o lombo do cucurucho, para que ao abrilo se forme a folerpa. Aquí tes uns exemplos de deseños que podes empregar para recortar:
Desdobra con coidado e descubre o deseño que acabas de crear! Agardamos que desfrutes moito decorando a casa con esta manualidade sinxela pero bonita.
Comentarios
Publicar un comentario