XOGA QUE TE XOGA. BANDIDO/COVID-19
BANDIDO/COVID-19
Alguén de por aquí ten ganas de xogar?Quero compartir con vós unha demo que podemos descargar baseada nun xogo de mesa coñecido co nome de “Bandido” elaborado por Martin Nedergaard Andersen e ilustrado por Lucas Guidetti Perez.
Pero, estes días, as persoas que conforman Ludilo adaptárono á realidade actual que estamos vivindo.
Este recurso é un xogo cooperativo de cartas de estratexia e observación para toda a familia, no que se pode traballar o razoamento, a memoria, a coordinación ollo-man e seguro que moitas cousas máis... Pode empregarse para xogar con todas as idades (+6 anos), no que poden participar ata catro persoas e onde os tempos da partida adoitan ser de 15 min, máis ou menos.
Pero… como se xoga?
Antes de nada, teremos que preparar as nosas cartas. Para iso precisamos descargar o material, imprimilo e amañar todo. Polo tanto, necesitamos, impresora, folios, tesoiras e traballo en equipo!
E cando teñamos todo listo xa podemos comezar.
En Bandido/COVID-19, todas as persoas xogamos xuntas para evitar que o virus se escape. Asegurádevos de comunicarvos entre todas (mantendo as distancias de seguridade) para maximizar as posibilidades de gañar. E agora....
1. Colle a carta de inicio (a que ten o virus) e colócaa no centro da mesa
2. Baralla o resto das cartas e colócaas boca abaixo nunha pila de roubo.
3. Reparte 3 cartas a cada xogador/a.
Veña, que xa explico como se xoga…
Comeza a persoa máis nova (en idade). Na súa quenda, coloca unha das súas cartas para conectala a unha ou máis cartas que xa están na mesa.
Como Bandido é un xogo cooperativo, as persoas que xogan deben debater a mellor maneira de proceder, pero ten coidado, non podes mostrar as túas cartas aos outros/as xogadores directamente.
Podemos facer unha excepción cos máis pequenos e pequenas da casa, para facilitarlle así a xogada.
Importante A carta que xogas debe encaixar perfectamente. Despois de colocar a túa carta, colle unha nova carta do mazo de roubo.
No caso de non poder xogar, podes colocar as túas cartas debaixo do mazo de roubo e coller tres cartas novas.
Continúan xogando o resto de xogadores. Seguide xogando ata bloquear todos os túneles ou ata que o mazo de roubo estea baleiro. Ten coidado de non colocar unha carta que faga imposible bloquear un túnel.
Fin do xogo. Quen gaña?
Se conseguides bloquear todos os túneles, gañariades o xogo xuntos. Se un túnel permanece aberto despois de colocar todas as cartas, o virus escapa e todos perdemos.
Recurso adaptado por ludilo
Material que podedes descargar