KIM

Lembrando a Kipling

Imos lembrar a un dos escritores de aventuras máis coñecidos de tódolos tempos. Trátase de Rudyard Kipling, que foi o primeiro británico en recibir o Nobel de Literatura, que acadou no 1907.

Unha da súas obras máis populares foi "El libro de la selva", publicado en 1894, cuxa temática está influenciada polo pasado colonial da India, de feito o escritor naceu en Bombay cando A India, formaba parte do Imperio Británico, aínda que sendo moi novo foi trasladado a Gran Bretaña, á metrópole, para a súa educación. Separación, da que atopamos certas reminiscencias no libro tamén coñecido como "El libro de las tierras vírgenes" o "El libro de la jungla", que afectaría profundamente ao escritor, que confesaría a tristura que experimentou na súa infancia lonxe do fogar paterno. A historia narra as aventuras dun cativo que é recollido por unha manda de lobos ao perder os seus pais. Esta temática lémbranos a outra novela, tamén moi coñecida, "Tarzán dos monos", escrita por Edgar Rice Burroughs no 1912, pero nesta ocasión en vez de estar ambientada no India, sitúase no continente africano, e en vez de ser "criado" por lobos, Tarzán é acollido por un grupo de primates. As historias de cativos que perdidos na xungla ou na selva son coidados por animais resultaban coñecidas e espertaban a curiosidade da época.

Noutro dos seus libros "Kim", publicada no 1901, o escritor presenta uns xogos nos que se adestra o seu protagonista, tamén un cativo orfo na India, para poder converterse en espía. Son os coñecidos como os xogos de Kim, porque este é o nome do cativo protagonista, e baséanse na capacidade para estimular os sentidos. Estamos na época das grandes rivalidades entre os distintos países para aumentar e reforzar os seus imperios coloniais.

ACTIVIDADE 1: Imos poñer un exemplo a través das distintas fotografías. No xogo que vos propoño buscarase potenciar a memoria e a vista:
Estas fotografías parecen idénticas pero,
- Que obxecto é o que falta na segunda fotografía?
- Que obxecto está repetido?
- Se o fas na casa podes tapar cunha tea a mesa onde coloques os obxectos e logo pedir que che apunten nunha folla todos os obxectos que sexan capaces de lembrar.
- Tamén podes pedir que che indiquen obxectos que presenten una determinada cor ou cuxa palabra comece por una determinada letra.
- E por último podes retirar un obxecto e logo que che digan que lugar ocupaba.





ACTIVIDADE 2: Outro xogo que podedes desenvolver na casa e que busca estimular o tacto consiste en meter nun saquiño distintas figuras ou diferentes obxectos. Tamén poden ser papeliños con determinadas formas que logo terán que reproducir. Os/as cativos/as colocaranse un detrás doutro. Un sacará unha figuriña ou papeliño e percorrerá o lombo do/a seu/súa compañeiro/a co seu dedo intentando reproducir a figura ou o obxecto de tal forma que o/a compañeiro /a sexa capaz de identificalo. Pode dicir en voz alta que obxecto cre que é ou se lle dades un papel pode intentar reproducir a figuriña, segundo el a entendeu. Engado unhas fotografías con formas como exemplo.

 

Photo by Saksham Gangwar on Unsplash